Никифорова (Платонова ) Елена Васильевна 1936 с. ыам ыйын 21 күнүгэр Платонова Наталья Никифоровна уонна Платонов Василий Семенович дьиэ кэргэттэригэр үһүс оҕонон күн сирин көрбүтэ. Аҕа дойду Улуу сэриитэ саҕаламмытыгар, аҕатын Василий Семеновиһы 1942 с. иккис хомуурга армияҕа ыҥырбыттара. Забайкальскай байыаннай уокурукка ат депотугар сулууспалаабыта. 1945 с. эргиллэн кэлбитэ. Елена Васильевна сэрии кэмигэр 5- 9 саастааҕа. Ийэтин Наталья Никифоровнаҕа илии-атах буолан көмөлөһөрө. Биир сыл аҕатын бииргэ төрөөбүт балтыгар Степанида Семеновнаҕа Майаҕа оҕо көрсүбүт. 1953 с.  7-с кылааһы бүтэрэн баран, ветеринар курсугар үөрэммитэ. 1954 с. Никифоров Василий Давыдовичтыын ыал буолаллар, түөрт оҕолоноллор. 1960 – 1989 сс. олохтоох балыыһаҕа медсестранан үлэлээбитэ. Ол кэнниттэн оскуолаҕа биэс сыл харабыллаабыта. Үс сыл музейга муоста сууйбута. Аҕабытынаан Василий Давыдовичтыын оҕолорун үөрэттэрэн, киэҥ суолга атааран, ыал оҥортообуттара. Бары дьиэлэнэллэригэр- уоттаналларыгар күүс- көмө буолбуттара. Билигин оҕолоро куоратынан, Мэҥэ-Хаҥалас улууһугар Павловскайынан, Хочонон, Тиэлигинэн олороллор, үлэлииллэр. Бэйэлэрэ эбэ, эһэ буоллулар. Кини минньигэс астаах, ыраас, сатабыллаах хаһаайка. Үлэтин таһынан баайарын, оҕуруо тиһэрин, иистэнэрин сөбүлүүрэ. Оҕолорун, сиэттэрин сылаас таҥаһынан хааччыйара. Кэлин сахалыы паннолоры, көбүөрдэри тигиинэн дьарыктаммыта. Культура уонна спорт эстафетатын быыстапкатыгар кыттар. Ол тикпит үлэлэрин оҕолоругар, сиэттэригэр бэлэхтээн үөрдэр.  Ийэбит оҕолоругар, сиэннэригэр үтүө холобур буолар.   Билигин бочуоттаах сынньалаҥҥа дойдутугар олорор. Сэрии сылын оҕото, үлэ бэтэрээнэ. Элбэх сиэн, хос сиэн күндү эбэтэ.