Васильева Евдокия Андреевна 1938 сыллаахха төрөөбүтэ. Сэрии сылларын оҕото, норуот маастара, уран тарбахтаах иистэнньэҥ. 3 саастаа5ар ийэтэ, түөрт оҕолоох огдообо кыайан иитэр кыаҕа суох буолан, арыый да кыанар аймахтарыгар ииттэрэ диэн биэрбит. Онтулара кыыһы көйгөтүтэн киһилии көрбөтөхтөр. Аччыктаан, сынньыллан өлүөх оҕону, туора дьон тыллаан, ийэтэ төттөрү ылбыт.

Оскуолаҕа аҕыйах кэмҥэ үөрэммит, учуутала атаҕастыырын тулуйбакка, аккаастаммыт. Биһиги көлүөнэ Дибдир ферматын оҕолоро бары да кэриэтэ ол учууталтан саллан үөрэхтэн маппыппыт диэн кэпсиир. Олох кыратыттан фермаҕа улахан дьоннуун тэҥҥэ үлэлэспит. Тоҕус сааһыттан колхуос фермаларыгар ньирэй көрбүт, ыанньыксытаабыт, детсадка ньээҥкэлээбит. Пенсияҕа тахсыар диэри Марха рабкообугар үтүө суобастаахтык үлэлээн Үлэ ветерана ааты ылбыта. Таркаайы нэһилиэгин Бочуоттаах олохтооҕо, Саха Өрөспүүбүлүкэтин Бочуоттаах Старейшината.

Сэрии ыар сылларын этинэн – хаанынан билэн улааппыт ийэм барахсан билигин да иистэнэр, кэрэни айар. Төһө да үөрэҕэ суох буоллар, сахалыы ааҕар. Хантан да кэл, ийэм итии чэйэ, минньигэс аһылыга өрүү бэлэм буолар. Мэлдьи түбүгүрэ, биһиги олохпутун чэпчэтэ сылдьар.