Аан дойдуну аймаабыт Аҕа дойду Улуу сэриитэ хас биирдии ыал аанын тоҥсуйан, хас биирдии киһи олоҕор ыар бэлиэни, сүтүгү хаалларбыт уоттаах сэрии… Хаһан да умнуллубат, өйөтөн-сүрэхтэн сүппэт аһыы, аба, курас санаа… Аҕа дойдуну көмүскээччилэр истэригэр  Потапов аймахтан 9  киһи ыҥырыллыбытыттан 7 эдэркээн, удьуору ууһатар киһитэ сэрии толоонугар хаалбыта. Сүүһүнэн, тыһынчанан, мөлүйүөнүнэн сэбиэскэй дьон курдук красноармеец, рядовой саллаат үрдүк аатын сүгэн Ийэ дойду көмүскэлигэр тыыннарын толук уурбут аймах дьонум туһунан кэпсиэм.

Үс  ини- бии Афанасий, Анемподист, Афанасий Потаповтартан кыра Афанасий сиэнэ Потапов Федор Спирдонович  1918с. төрүөх. 1942с. атырдьах ыйын 13 күнүгэр Аҕа дойдуну көмүскүүр Улуу сэриигэ ыҥырыллан барбыта. Краснознаменнай Харьковско - Бухаресткай дивизия 375 нүөмэрдээх  стрелковай артиллерияга сулууспалыыр. 0133 № 373 Штадив  15.04.-15.05.1943 оперсводкатыттан көстөрүнэн 375 сд атын 93№  ПАП РКГ, 493№ ИПТАП РКГ, 16№ ГВ.МП, 351 уонна 332№ ОГМД, 79№ ГВ. МП, 137№ ОГБ.ПТР сэриилэри кытта бииргэ ЕРИК, ШОПИНО кирбии оборонатыгар тураллар. Федор Спиридонович бу оборона кэмигэр 1943с. ыам ыйын 2 күнүгэр сырдык тыына быстыбыта. Курскай уобалас, Белогородскай оройуон Шопино дэриэбинэттэн 300 м арҕаалыы көмүллэ сытар.