Марков Петр Егорович 1923-1988сс- Мэҥэ Хаҥалас оройуонун I Мөҥүрүөн нэһилиэгэр төрөөбүт, Үлэ фронун кыттыылааҕа. Бэйэтин ахтыытыттан: "1943с сэрии үһүс сайына этэ. Киһи чэгиэнэ, эдэрэ барыта маҥнайгы хомуурга, сэриигэ барбыт кэмэ этэ. Үлэ фронугар дьону мобилизациялааһын саҕаламмыта. Оччолорго мин 20 саастаах этим. Эдэрдэр сэриигэ харахпытынан сыыйыллан барбатахтар аҕыйах этибит. Бэс ыйыгар 50-55 саастаахтары кытары Майаҕа ыҥырыллыбыппыт. I Мөҥүрүөнтэн ахсыа этибит, ол иһигэр Хомууна холкуостан алтыабыт: Харитонов Василий Михайлович, Марков Петр Петрович, Марков Гаврил Прокопьевич, Марков Семен Егорович, Ильин Павел Павлович. Муолатап холкуостан 2 киһи этэ: Кудинов Василий Дмитриевич, Никитин Иннокентий Петрович. Майаҕа тиийбиппит кэннэ Харитонов Василий Михайловиһы уонна Марков Петр Петровиһы самолет түһэр сиригэр Учурга ыытарга быһаарбыттара. Кинилэр онно айаннаан иһэннэр Дьокуускай куорат аэропордугар икки сыл үлэлээбиттэрэ уонна дойдуларыгар төннүбүт этилэр. Онтон биһигини Тиксиигэ ыытарга быһаарбыттара. Дьокуускайга ый аҥаара үлэлэппиттэрэ. «Вторая пятилетка» диэн борохуотунан хоту устубуппут. 4 суукка айаннаан тиийбиппит кэннэ муора кытылыгар таһаҕас сүөкэппиттэрэ. Ол кэмҥэ Эмиэрикэ көмөлөһөрө, бурдук, саахар, араас табаар, оттук кэлэрэ. Ол оннугар мас, таас чох тиэнэн бараллара. Биир борохуот хас да баарсаны аҕалара. Сарсыарда 6 чаастан киэһэ 6 чааска диэри үлэлиирбит, ол быыһыгар биирдэ аһаталлара. Мас баарсаҕа олорорбут. Үөһэ остолобуой баара, аллараа түстэххэ кыараҕас баҕайы хараҥа хас да лүүк баара. Биир лүүккэ 12 киһилээх биир биригээдэ олороро. Ас нуормата күҥҥэ 800г килиэп, миин уонна онон бүтэр. Аспытыгар топпот буолан аччыктыырбыт, нэһиилэ үлэлиирбит.Ас мөлтөх уонна үлэбит ыарахан буолан, дьон үксэ ыалдьара. Ильин П.П. барыан инниттэн ыалдьар этэ, Дьокуускайга кэлэн, иһинэн ыалдьан өлбүтэ.
Герой летчик Папанин үлэһиттэри көрө кэлэ сылдьыбыта. Онтон ыла аспыт нуормата лаппа тупсубута. Күһүн кыдьымах киириэн иннинэ Дьокуускайга төннүбүппүт. Ый аҥаара айаннаан, кыдьымах киирэ турдаҕына, куораты булбуппут. Комиссия тэриллэн доруобуйабытын бэрэбиэркэлээбиттэрэ, ол түмүгүнэн сорохтор дьиэлэригэр төннүбүттэрэ. Биһигиттэн Иннокентий Петрович, Марков Семен Егорович төннүбүттэрэ. Хаалбыт дьон баарсабыт таһаҕаһын сүөкээбиппит. Кыраан диэн суоҕа, наар илиинэн таһарбыт. Борохуоту Намҥа Граф биэрэгэр кыстыкка илдьибиттэрэ. Онно быһыкка остуолба дьаамата хаһан, Кудинов Василийдыын икки ыйтан ордук үлэлээбиппит. Түүлээхситтэри үлэҕэ мобилизациятттан босхолуур туһунан уураах тахсыбыта. Кудинов В.Д. эрдэ барбыта, миэхэ холкуоһум ыспараапка биэрбитин кэннэ тохсунньу ыйга ыыппыттара. Үс сыл түүлээхситинэн, онтон тырахтарыыһынан үлэлээбитим, онтон доруобуйабынан уурайбытым. 1950-1961сс сайынын окко, кыһынын от тиэйиитигэр сылдьыбытым. 1978 сылга диэри оскуолаҕа хачыгаардаабытым".
16.04.1985
