Биһиги эһэбит Колакаров Прокопий Семенович 1923 сыллаахха уруккута Бүлүү уокуругун Ньурба улууһун Бордоҥ нэһилиэгэр төрөөбүт. Эрдэ тулаайах хаалбытын эдьиийэ Татыйыына Саввична Долбосова ииппит. Эдьиийэ, күтүөтэ Долбосов бастакы колхостаахтар эбит. Борокуоппай үлэни кыайар буолуоҕуттан улахан дьоннуун тэҥҥэ үлэлээбит. Аҕа дойду сэриитэ саҕаланарыгар 18 саастаах, “Трудовой отряд”биир төһүү үлэһитэ эбит. Кыһын сүөһү көрүүтүгэр, от-мас тиэйиитигэр, сайынын отчут бастыҥа буолан дохуот аахсар бастыҥ үлэһит, сэрии бастакы сылларыгар ыҥырыкка барбатах.

Онтон 1944 сыл от ыйын 12 күнүгэр Ньурба РВК-тынан армияҕа ыҥырыллыбыт. Ол саҕанааҕы сырыы-айан уһуна-киэҥэ бөҕө, инньэ Ньурбаны даҕаны икки суукка айаннаан булуллара дииллэр. Эгэ ол Дьокуускайга тиийэн, Өлүөнэнэн пароходунан ыйы ыйдаан айаннаан Иркутскайга тиийэн, онтон тимир суол уһун айанын айаннаатаҕа буоллаҕа дии.

 Эһэбит байыаннай бирисээгэтин тохсунньу ый 10 күнүгэр 1944 сыл ылар. Ол туһунан 3 стрелкова рота старшай лейтенант званиелаах Тарутин илии баттаабыта көстөр. Онтон кулун тутар ый 15 күнүгэр 1944 сыл Забайкальскай фронт 36 А 386 – 3 стрелковай полка, 3 стрелковай батальонугар 7 стрелковай ротаҕа стрелок, красноармеец диэн байыаннай киниискэтигэр суруллубут. Ити курдук ыраах Саха сирин түгэх, кырыы түөлбэтин кыра үөрэхтээх эдэр уола Ийэ дойдутун көмүскүүр Аҕа дойду сэриитигэр турунан, дойдутун илин границатын сэриилээн киирэр милитарическай Японияны утары сэриигэ кыттыыны ылан саа-саадах тутар. Эһэбит Борокуоппай баыаннай билиэтэ салгыы кэпсииринэн ити сыл В1, автоматчиктар роталарыгар автоматчик диэн бэлиэтэммит. Аны ити ый 12-гэр 152 стрелковай полка 2 стрелковай батольонугар, онтон 6 стрелковай ротатыгар стрелогынан сылдьыбыт. 1946 сыл бу стрелковай полка 1 стрелковай  батальонугар стрелок эбит. 1947 сыл олунньу ый 10-тан бу полка уонна батальон 3-с стрелковай ротатыгар стрелогунан сулууспалаабыт. Дьэ онтон СССР Верховнай Сэбиэтин Президиумун уурааҕар олоҕуран муус устар ый 2 күнүгэр 1947 сыллаахха сэриилэһэр Аармыйаттан демобилизацианна диэн Полозков Штаб Начальнига илии баттааһына туоһулуур.

Дьэ ити курдук эһэбит Борокуоппай Ийэ дойдутун иннигэр ытык иэһин төлөөн, эппит байыаннай андаҕарын толорон, 1944 сылтан 1947 сылга дылы төрөөбүт дойдутун кыа хаанынан уһуннарбыт кырыктаах фашисткай Германия кыттыгаһа сэриимсэх сиэмэх Японияны утары сэриигэ кыттыспыта.

 Сэрииттэн эргиллэн кэлэн баран колхоһугар, онтон бөдөҥсүйбүт совхозка, үтүө суобастаахтык илиитин араарбакка сүөһү үлэтигэр үлэлээбит. 1952 сыллаахха олоҕун доҕорун Ефремова Аананы көрсөн 5 оҕону төрөтөр, кыра кыысчаана Наташа биир саастааҕар, баара-суоҕа 45 сааһыгар олохтон туораабыт...

 Эһэбит Борокуоппай төһө да кылгастык олордор, бу сирдээҕи олоҕор сиэрдээхтик олорон, биир саха ыччатыгар тиксибит дьылҕатын чиэстээхтик олорбут диэн кини ыччаттара киэн туттабыт! “Ким да умнуллубат, туох да умнуллубат” кынаттаах тыллар биһиги Колакаровтар дьиэ-кэргэҥҥэ көлүөнэттэн-көлүөнэҕэ бэриллэн, бу эйэлээх халлаан анныгар олорорбутугар махтанан Эһэбит Борокуоппай аатын сүтэрбэккэ, киэн тутта кэнэски ыччаппытыгар хааларын ситиэхпит.