Харитонов Николай Петрович 

Мин эһэм, аҕам аҕата Харитонов Петр Петрович диэн. Эһэм Малдьаҕартан 1941 сыллаахха уоттаах сэриигэ барбыт. Кэргэнэ Харитонова Мотрена аҕабын төрөтөн баран күн сириттэн арахсыбыт. Эһэм сэриигэ барыар дылы уолун бэйэтэ көрбүт. Сэриигэ барарыгар аҕам Харитонов Николай Петрович, балтараалаах уол, тулаайах хаалбыт. Эдьиийэ Харитонова Евдокия Петровна ииппит. Эһэм 1944 сыллаахха Ленинград куорат анныгар бааһыран өлбүт. Братскай могилаҕа хараллан сытар үһү. Аҕам сэттэ кылааһы бүтэрэн баран холкуоска үлэлээбит. Армияҕа сулууспалаан кэлэн баран мин ийэбин Харитонова Ольга Алексеевнаны кэргэн ылар. Кинилэр икки кыыс оҕону төрөтөн уонна биир уол оҕону ииппиттэр. Билигин 7 сиэннээхтэр, сир симэҕэ аҕыс хос сиэннээхтэр. Мин аҕам үйэтин тухары холкуоска, совхозка үлэлээбитэ. 1969 сыллаахха партияҕа киирбит. Үлэлиир кэмигэр Москваҕа Норуот хаһаайыстыбатын ситиһиилэрин быыстапкатыгар бара сылдьыбыта, пятилетка ударнига, социалистическай куоталаһыы хас да төгүллээх кыайыылааҕа, элбэх грамоталарынан үчүгэй үлэтин иһин наҕараадаламмыта. Элбэх чемпион мэтээллээх этэ. Аҕам 70-н ааһан баран күн сириттэн суох буолбута.

           Кыыһа Павлова Маргарита Николаевна