Михайлов Дмитрий Константинович 1907 сыллаахха Арҕаа Хаҥалас Нөмүгү нэһилиэгэр төрөөбүт. Кини Төллөй Дьэлиһиэй сиэнэ, Дьонтоон Мэхээлэ хос сиэнэ, биэс Мэхээлэйэптэр диэн элбэх уолаттардаах халыҥ аймах сыдьаана буолара биллэр. Дмитрий Константинович 4 кылаас үөрэхтээх эбит. 1935-1939 сылларга Нөмүгү нэһилиэгин сэбиэтин секретарынан уонна председатель солбуйааччытынан үлэлээбит. 1939 сыллаахха ыам ыйыттан Покровскайдааҕы сельпо эргиэҥҥэ инспекторынан, хаһаайыстыбаннай чаас председатели солбуйааччынан үлэлээбит. 1941 сыллаахха нэһилиэк сэбиэтин председателлэрин үөрэтэр кууруска үөрэммит уонна бэс ыйын 21 күнүттэн Өктөм нэһилиэгин советын председателинэн анаммыт. 1942 сыл олунньу ыйыттан Нөмүгү нэһилиэгин түөрт колхуоһун хабар олохтоох сэбиэт председателинэн ананан дойдутугар, Нөмүгүгэ1945 сыл күһүнүгэр диэри үлэлээбит.

Аҕа дойду сэриитэ саҕаламмыт кырыктаах кэмнэригэр Дмитрий Константинович олохтоохтору түмэн күргүөмнээх үлэҕэ көҕүтээччинэн буолбут. Кини салайыытынан нэһилиэгин дьоно государственнай заемна көхтөөхтүк сурутан, оборона фондатыгар элбэх үбү-харчыны хомуйбуттар, сылаас танаһы тигэн фроҥҥа ыыппытттар, икки танковай колонна тутуутугар харчынан көмөлөспүттэр. Михайлов Д.К. нэһилиэгин дьонун ыарахан кэмҥэ өйөөн-убаан, күүс-көмө буолан, сөпкө тэринэн, салайан, хоргуппатаҕа, биир да киһи аччыктаан өлбөтөҕө. Нэһилиэк дьоно кинини үтүөтүн иһин дириҥник ытыктыыр эбиттэр.

Сэрии кэмигэр таһаарыылаах үлэтин иһин «Аҕа дойду сэриитигэр килбиэннээх үлэтин иһин» («За доблестный труд в годы ВОВ») мэтээлинэн наҕараадаламмыт. 1945 сыл күһүн доруобуйата мөлтөөн үлэлээн тохтууругар тиийбит. Кэргэнэ Анастасия Романовна (аҕатынан Денисова) сэрии кэмигэр бары ол саҕанааҕы дьон курдук тэҥҥэ үлэлээн « Аҕа дойду сэриитигэр килбиэннээх үлэтин иһин » мэтээллээх. Кыайыы үөрүүлээх ыһыаҕар сүүрүү, мас тардыһыы күрэхтэһиилэргэ кыттыбыт уонна нэдиэлэ курдугунан ыалдьан өлбүт. Биир саастаах кыыстара ийэтэ суох хаалбыт. Дмитрий Константинович 1947 сыллаахха ыарыытыттан кыайан өрүттүбэккэ өлбүт.

Соҕотох хаалбыт кыыһа Мария Дмитриевна Михайлова 45 сыл доруобуйа харыстабылыгар үлэлээн, кэргэнинээн Александр Михайлович Семеновтыын Уулаах-Ааҥҥа олохсуйан бииргэ олорбуттара 50 сылтан орто. Үс оҕону төрөтөн, улаатыннаран, алта сиэннээхтэр, биир хос сиэннээхтэр.