Аҕабыт Афанасьев Егор Павлович 1923 сыллаахха Ньурба улууһун Бордоҥнэһилиэгин “Айда” түбэтигэр Афанасьев Байбал-Байыана уонна Маарыйа Ньукулаайабына дьиэ кэргэнигэр төрөөбүтэ. Дьоно олохтон эрдэ туорааннар тулаайах оҕо кырыымчык, кыһарҕаннаах олоҕун билэн улааппыта.  Быыкаан сааһыттан айаҕын ииттинээри холкуоска кыайар үлэтигэр барытыгар үлэлээбит. Аҕа дойду сэриитэ бүрүүкээн турар сылларыгар бастыҥ стахановецтардыын тэҥҥэ үлэлээн, 1947 сыллаахха “1941-1945 с.с килбиэннээх үлэтин иһин” мэтээлинэн наҕараадаламмыт.

1967 сыллаахха 44 сааһыгар Ст. Васильев аатынан совхозка бастакы тэриллибит Нефтебазаҕа сэбиэдиссэйдээбит. Ити үлэҕэ ананан киирэригэр колхуоска үлэлээбит ыстааһа 28 сыл эбит. Сыл үлэлээбитин кэннэ совхоз Киин хонтуоратыгар счетовод-кассирынан көһөрбүттэр.

Онтон 1970 сыллаахха Маалыкай рабкообар көһөрбүттэр: “Переведён в распоряжение Малыкайского рабкооба в порядке усиления кадров рабкоопа- Приказ N41 п.3 от 11 марта 1970”, промтовар ыскылаатыгар сэбиэдиссэйинэн анаммыт. Сыл буолан баран экспедиторынан көһөрбүттэр. 1975 сылга аны хаһаайыстыбаннай табаар ыскылаатыгар сэбиэдиссэйинэн анаммыт, 1978 сылга пенсияҕа тахсыар дылы ити үлэтигэр үлэлээбит.

 Үлэтин киниискэтин көрөн олордоххо 32 сыл холкуос, сопхуос сайдар суолугар оҕотук, эдэр сааһын чиэһинэйдик, суобастаахтык үлэлээбит. Олоҕун дьоһун сааһын, 8 сылы рабкооп тэрилтэтигэр сүрдээх эппиэтинэстээх салаатыгар анаабыт.

Аҕабыт ити олорбут, үлэлээбит сылларыгар кутугунас, түргэн-тарҕан туттунуулаах, чиэһинэй, дьону кытта уопсай тылы сатаан булан кэпсэтэр буолан, салайар уонна суот-учуот курдук ыарахан үлэлэргэ ананан үтүө суобастаахтык үлэлээн кэллэҕэ. Онтун туоһулуур Бочуотунай грамоталар “ Холбос” респотребсоюзтан , “Коммунистическай үлэ ударнига” бэлиэ, “ В.И Ленин төрөөбүтэ 100 сылыгар үлэҕэ килбиэнин иһин”мэтээл, аҕабыт дьоһун олоҕун кэрэһэлииллэр.

 Аҕабыт 1952 сыллаахха Маалыкай олохтооҕо Васильев Касьян-Сэккий оҕонньор улахан кыыһа Дарияны кэргэн ылан 7 оҕоҕо күн сирин көрдөрбүтэ. 1 кыыс ыарыһах төрөөн эрдэ олохтон туораабыта. Кэргэнэ Дария эдэр сааһыгар ыалдьан олохтон туоруон иннигэр, кыһалҕаттан икки кэнники кыргыттарын ыалга ииттэрэ биэрбитэ. Ираны Маалыкай олохтооҕо Василий Наумович Николаев дьиэ кэргэнигэр, Настяны ийэбит балта Татьяна Касьяновна улаатыннарбыта. 1966 сыллаахха 43 сааһыгар огдообо хаалан 4 оҕотун: 3 кыыһы уонна уолун орто оскуоланы бүтэттэрэн, салгыы идэ ылан, үлэһит уонна ыал буолар олохторун оҥкулларын оҥорбута. Сиэттэр минньигэс сыттарын, күлүүлэрин истэр дьолломмута. 1985 сыл бэс ыйын 18 күнүгэр ыарахан ыарыыттан олохтон туораабыта.

 Биир киһи олоҕор тиксэр олоҕу дьоһуннаахтык олорбутун, сиэннэрэ, хос сиэттэрэ салгыахтарыгар эрэллээхпит.

      Кыргыттара Афанасьева Елена Егоровна, Ксенофонтова Ирина Васильевна.

                                                         2020 с.