Аҕа дойдуну көмүскүүр Улуу сэриигэ Горнай оройуонуттан 886 киһи ыҥырыллыбытттан 480-на бу сырдык олох иһин бэйэлэрин тыыннарын толук уурбуттара [1, с.5]. Ол иһигэр I Одуну нэһилиэгэр олорон ааспыт Ноговицын Михаил - Оройко Мэхээлэ кыра уола Пётр уонна сэттэ сиэнэ барбыттара. Олортон төрөөбүт дойдуларыгар икки эрэ уол тыыннаах эргиллибиттэрэ. Атыттар Ийэ дойду көҥүлүн иһин сэрии хонуутугар олохторун толук уурбуттара.
Кинилэр кыргыһыы хонуутуттан, госпитальтан суруйан ыыппыт суруктарын аймахтара кэриэстээн уура сылдьалларын уонна Петров Н.Я., Алексеев В.И. хомуйан оҥорбут «Мин тыыннаахпын биллэрэбин...» кинигэттэн ылан түмтүбүт. Ону таһынан интернет ситимигэр «Память народа» сайтан, Саха сирин архыыбыттан о.д.а. араас туоһулуур докумуоннары ыллыбыт.
